ئوال وبسئلهولك ......... الى بينا دة كان اة ؟
بسألك اللى بينا كان اسمه ايه
انتى فاهمه ايه سؤالى
ولا اعيده بشكل تانى
يعنى انا فعلا حبيبك
وانتى تبيقيلى ايه
فعلا حبيبتى
ولا يمكن كنا واخدين ع الكلام مع بعضنا
كنا لاقين نفسنا مع بعضنا
كنا فاهمين بعضنا
ولا عارفه
انا فعلا ما بقتش فاهم اى حاجه
هو فعلا كان ما بينا اى حاجه
ولا ايه
عارفه انا حاسس بايه
حاسس زى ما اكون سبت بلدى
وتايه لوحدى ف الزحام
احساس ضرير واقف لوحده ف الضلام
بقالنا كتير م كلمناش بعض
و معرفناش نحس بعض
نونس بعض
كان نفسى نخاف قوى على بعض
كان كل واحد مننا بيحس حاجه
كان فيه اكيد ما بينا حاجه
دلوقتى اكيد ما بينا حاجه
حاجز من الخوف والكلام
حاجز بيمنع عننا حتى الكلام
والطفل اللى كان بيجرى ويحلم
صابه الشلل حزين وحيد
حتى مش عارف ينام
سهران يفكر ف السؤال
والسؤال بيجيب سؤال
والطريق مودى فين
وفين ح نلقى فيها مين
ومين يا ترى ح يحبنا
واحنا بنكره نفسنا
ونفسنا نلاقى بر ندوس عليه
والسكه بعيده وحلم بعيد وحب بعيد
وانا يدوب لسه ح تعود على انى تانى ح اعيش وحيد
لسه ح اتعلم استنى يجيلى من بعيد امل جديد
لسه تانى ح اطوى صفحة الايام
وارجع زمان واعيش زمان
بس زمنا ده ما بيرجعش تانى
حتى الفرحه فيه بقت انى اعانى
والمعانى فيه متغيره وملخبطه
ما بقتش فاهمها ولا هيه نفسها فاهمنى
ح اروح لفين
ح اروح لمين
انا ح افضل هنا
ح استنى انا
يمكن يكون هو برضه بيدور عليه
انا تعبت م المشوار
ونفسى ارتاح شويه
وانتى لما تعوزى قلبى ح تلاقيه
ف نفس المكان اللى سبتيه فيه
انا ح اقوم
اصل صلاة الفجر وجبت
ح اصليها وانام شويه
يمكن ارفع ايدى واتوب لله ويتوب عليه
يمكن دموعى المتجمده تتحرك شويه
يمكن اشوف ف الصلاة سكه جديده
تكون حنينه حبه عليه
يمكن ربنا يسهل طريقى
ويخلص قوام
قبل م الاوهام تقتل اللى باقى من فرحتى
تخلّص عليه
يمكن حضن امى يحس بغربتى وكبتى ياخدنى
واريح فيه شويه
يمكن الاقى طفل ماشى يبتسملى يهون الدنيا عليه
يمكن تأخدنى صورتك للحياه
واعيش شويه
الأربعاء سبتمبر 10, 2008 9:10 am
